Shqipëria po përjeton një verë me fluks gjithnjë e më të madh turistësh. Dhjetëra mijëra vizitorë mbërrijnë çdo ditë në bregdet dhe zonat malore. Por, si për çdo industri që përballet me një volum të lartë klientësh, edhe sektori i turizmit, konkretisht hotelet dhe restorantet, përballet me përgjegjësi reale dhe të paprecedentë.

Kjo rritje e frekuentimit është një lajm i mirë për ekonominë, por vjen edhe me një detyrim të madh: garantimin e sigurisë për jetën, shëndetin dhe pasurinë e klientëve.

Një incident i vetëm mund të kthejë një eksperiencë pushimi në një ngjarje tragjike dhe të pakthyeshme. Dhe më shqetësuese akoma, mund të minojë reputacionin e turizmit shqiptar në sytë e botës.

Çfarë do të thotë “Sigurim i Përgjegjësisë Civile”?

Mbulon përgjegjësinë për dëmet trupore në çdo person, si dhe humbjet e dëmet materiale në ambientet e biznesit tuaj bazuar në Ligjin Nr. 30/2024, datë 04.04.2024 dhe në Ligjin Nr. 93/2015, “Për turizmin”.

Në rast incidenti, sigurimi siguron mbrojtje financiare për subjektin dhe kompensim të drejtë për klientin e dëmtuar.

Pikërisht për këtë arsye, ligji shqiptar parashikon detyrimin e subjekteve hoteliere dhe të shërbimit ushqimor për të pasur një sigurim të përgjegjësisë civile ndaj palëve të treta – pra ndaj klientëve që qëndrojnë ose konsumojnë në ambientet e tyre.

Modeli ligjor shqiptar parashikon qartë detyrimin e lidhjes së një police sigurimi për përgjegjësinë civile ndaj palëve të treta, një mbulim që mbulon dëme të mundshme ndaj jetës, shëndetit, pronës, apo imazhit të klientëve nga incidentet në ambientet e hotelit apo restorantit.

Nëse një hotel apo restorant nuk garanton këtë mbulim, eksponimi ndaj padive civile apo administrative është i madh. Përveç shqetësimeve financiare, përjashtimi nga ky obligim mund të rezultojë në gjoba dhe në përjashtimin nga regjistrimi apo licensimi si veprimtari turistike.

Në këtë kuadër, Shoqata e Siguruesve të Shqipërisë i bën thirrje të gjitha strukturave të mikpritjes:

1. Të verifikojnë menjëherë nëse janë në përputhje me detyrimin ligjor për sigurimin e përgjegjësisë civile;
2. Të komunikojnë me kompanitë e licencuara të sigurimeve për të përfituar kushtet më të mira të mbrojtjes;
3. Të konsiderojnë këtë sigurim si pjesë të domosdoshme të standardit të tyre të shërbimit, dhe jo si një shpenzim shtesë të evitueshëm.
4. Në të njëjtën kohë, u bëjmë thirrje edhe institucioneve përgjegjëse të kontrollit dhe monitorimit që të ushtrojnë më tepër mbikëqyrje për zbatimin e këtij detyrimi ligjor, sidomos gjatë muajve të verës kur frekuentimi është më i lartë.

Mjafton një incident i vetëm: një rrëshqitje në korridorin e lagësht, një helmim ushqimi, një dëm nga pajisje jo të mirëmbajtura, apo humbje e sendeve personale: të gjitha këto pikat e rrezikut janë pjesërisht të parandalueshme, por edhe plotësisht të mbulueshme nga sigurimi i duhur.

Në rast të dëmtimit, kompania e sigurimit kompenson direkt viktimën me shumat e përcaktuara në policë, ndërsa pronari i strukturës kryen deklarimin dhe bashkëpunon në hetim, sipas rregullave të Kodit Civil.

Në këtë mënyrë, bizneset shmangin konfliktet dhe penalitetet, konsumatori përfiton kompensim të drejtë dhe efikas, ndërsa reputacioni i Shqipërisë si destinacion gjithnjë e më cilësor ruhet.

Turizmi i qëndrueshëm kërkon mikpritje të përgatitur, me standarde të larta sigurie – dhe kjo nis me sigurimin e detyrueshëm për përgjegjësinë civile.

Të gjithë duam një sezon veror të suksesshëm, të mbushur me turistë të kënaqur dhe ekonomi vendase që lulëzon. Por ky sukses nuk mund të ndërtohet mbi rrezikun dhe pasigurinë. Sigurimi i përgjegjësisë është një garanci për biznesin, për klientin dhe për të ardhmen e turizmit shqiptar.