Çdo person që pëson një dëmtim nga përdorimi i mjeteve të transportit brenda Shqipërisë ka të drejtë të kërkojë dëmshpërblim për humbjet e pësuara. Dëmet ndahen kryesisht në dy kategori: dëme ndaj personit dhe dëme ndaj pronës.

Dëmet ndaj personit përfshijnë:

• Dëme pasurore, të cilat lidhen me humbje të përkohshme ose të përhershme të aftësisë për punë dhe, në rastet më të rënda, me humbjen e jetës.

• Dëme jopasurore, që përfshijnë:

  • Dëm biologjik: dhimbje fizike ose paaftësi.

  • Dëm moral: vuajtje shpirtërore.

  • Dëm ekzistencial: ndikim në jetën e përditshme dhe marrëdhëniet personale.

Dëmet ndaj pronës përfshijnë dëmtimet materiale të sendeve, automjeteve ose pronës së dëmtuar gjatë aksidentit.

Roli i sigurimeve është thelbësor në këtë drejtim, duke ofruar mbulim financiar të menjëhershëm për personat e dëmtuar dhe familjet e tyre. Kjo ndihmon që dëmshpërblimet të paguhen shpejt dhe në mënyrë të drejtë, duke siguruar mbrojtje ekonomike dhe shpirtërore dhe duke lehtësuar pasojat e aksidenteve për individin dhe familjen e tij.

Sipas të dhënave të fundit të Autoritetit të Mbikëqyrjes Financiare për 10-mujorin e vitit 2025:

• 70.74% e dëmeve të paguara nga tregu i sigurimeve janë dëme të paguara si përgjegjësi motorike ndaj palëve të treta, përmes sigurimeve detyrueshëm motorike.

• Tregu i sigurimeve pagoi 46.3 milionë euro për dëme të përgjegjësisë motorike ndaj palëve të treta nga janari deri në tetor 2025, një rritje prej 0.06% krahasuar me të njëjtën periudhë të vitit të kaluar.

• Nga kjo shumë, rreth 39.4 milionë euro janë paguar si TPL, 6.3 milionë euro përmes kartonit jeshil dhe 620 mijë euro përmes policave kufitare.

Këto shifra tregojnë qartë rëndësinë e sigurimeve në ofrimin e mbrojtjes për qytetarët dhe në stabilitetin ekonomik të familjeve që preken nga aksidentet rrugore. Sigurimi jo vetëm që mbulon dëmet materiale, por gjithashtu ndihmon në menaxhimin e pasojave shpirtërore dhe sociale të aksidenteve.