1. Çfarë nënkupton faktori i riskut “Historiku i dëmeve” dhe kujt i aplikohet?

Faktori i riskut “Historiku i dëmeve” është një element që përdoret në përllogaritjen e primit të sigurimit të detyrueshëm motorik (MTPL e brendshme) dhe pasqyron sjelljen historike të të siguruarit në raport me dëmet e shkaktuara.

Ky faktor merr në konsideratë të gjitha dëmet e raportuara, përfshirë edhe rastet kur shkaktari i aksidentit nuk është i shënuar në policën e sigurimit.

Bazuar në Rregulloren nr. 156, datë 19.09.2024, të miratuar nga Autoriteti i Mbikëqyrjes Financiare, faktorët e riskut aplikohen për kategorinë e autoveturave në kuadër të produktit të sigurimit të detyrueshëm motorik.

2. Si funksionon faktori “Historiku i dëmeve”?

Faktori “Historiku i dëmeve” zbatohet për të gjithë drejtuesit që kanë në pronësi autovetura dhe klasifikohet në bazë të numrit të dëmeve të raportuara:

• Klasa I: Të siguruarit pa asnjë dëm të raportuar gjatë periudhës përkatëse, të cilët përfitojnë ulje të primit të sigurimit.

• Klasa II: Të siguruarit me një dëm të raportuar, për të cilët aplikohet rritje e moderuar e primit.

• Klasa III: Të siguruarit me dy ose më shumë dëme të raportuara gjatë tre viteve të fundit, për të cilët aplikohet rritje më e lartë e primit të sigurimit.

Ky sistem synon të shpërblejë sjelljen e kujdesshme në drejtim dhe të reflektojë në mënyrë të drejtë nivelin e riskut.

3. Cilët janë faktorët kryesorë të riskut që ndikojnë në primin e sigurimit?

Sipas Rregullores nr. 156, faktorët kryesorë të riskut që përdoren në përllogaritjen e primit të sigurimit MTPL janë:

• Historiku i dëmeve – një historik pa dëme reflektohet me ulje të primit, ndërsa një historik me dëme shoqërohet me rritje të tij.

• Fuqia motorike – mjetet me fuqi më të vogël motorike tarifohen më pak se ato me fuqi më të madhe.

• Mosha e të siguruarit – drejtuesit e moshës 18–21 vjeç tarifohen më tepër.

• Eksperienca në drejtimin e mjetit – drejtuesit me eksperiencë deri në dy vite tarifohen më lart.

• Përdorimi i mjetit – mjetet në pronësi të subjekteve tregtare tarifohen më tepër se ato në pronësi të individëve.

• Qarku i regjistrimit – mjetet e regjistruara në qarqet Berat, Dibër dhe Kukës tarifohen më pak krahasuar me qarqet e tjera.

• Vjetërsia e mjetit – mjetet më të reja tarifohen më pak se mjetet e vjetra.

4. Ku mund të gjenden koeficientët dhe përllogaritësi i primit?

Shoqëritë e sigurimit, anëtare të Shoqatës së Siguruesve të Shqipërisë, publikojnë në faqet e tyre zyrtare:

• tabelat e koeficientëve për faktorët e riskut

• shembuj praktikë të zbatimit

• përllogaritës online për primin e sigurimit

Këto mjete synojnë rritjen e transparencës dhe informimin e konsumatorëve.

5. Si mund të kontrollohet historiku i dëmeve?

Çdo qytetar ka të drejtë të kërkojë pranë shoqërisë së sigurimit pasqyrën e historikut të dëmeve dhe klasën e “Historikut të dëmeve” që i është aplikuar.

6. A lidhet historiku i dëmeve me mjetin apo me drejtuesin?

Sipas rregullores në fuqi, faktori “Historiku i dëmeve” lidhet si me të siguruarin në emër të të cilit është mjeti, ashtu edhe me shkaktarin e aksidentit, edhe në rastet kur ai nuk është i shënuar në policën e sigurimit.

7. Ku mund të ankohen qytetarët?

Për çdo parregullsi qytetarët mund të ankohen pranë:
a) Pranë shoqërisë së sigurimit
b) Nëse nuk zgjidhet, tek AMF: amf@amf.gov.al