Vera e këtij viti ka hyrë në histori si një ndër më të rëndat për Evropën dhe më gjerë. Zjarre masive, valë të zgjatura të nxehtësisë dhe përmbytje të papritura kanë prekur miliona njerëz, duke lënë pas shkatërrime dhe pasiguri. Sipas të dhënave të fundit, vetëm gjatë gjysmës së parë të vitit 2025 dëmet ekonomike nga fatkeqësitë natyrore në nivel global kanë arritur në 131 miliardë dollarë, nga të cilat rreth 80 miliardë janë mbuluar nga kompanitë e sigurimit.

Në Evropë, flakët kanë qenë armiku kryesor. Ky ka qenë sezoni më i keq i regjistruar ndonjëherë për nga sipërfaqja e djegur: mbi një milion hektarë tokë janë përpirë nga zjarret në Spanjë, Francë, Portugali, Greqi, Turqi, Shqipëri e Mal të Zi. Spanja, me mbi 382 mijë hektarë të shpallur zona katastrofe, ka përjetuar një verë të zjarrtë që ka lënë pas fshatra të shkrumbuar dhe bujqësi të rrënuar. Në Qipro, brenda pak ditësh, një zjarr në Limassol detyroi evakuimin e gjashtëmbëdhjetë komuniteteve dhe shkaktoi viktima, duke tronditur opinionin publik.

Nxehtësia ekstreme që përfshiu kontinentin jo vetëm që ndezi flakët, por vuri në provë edhe shëndetin dhe rezistencën e njerëzve. Temperaturat rekord çuan në shpalljen e alarmeve të kuqe në Francë, Bullgari, Hungari, Turqi dhe Mal të Zi, me thirrje për qytetarët që të kufizonin lëvizjet gjatë ditës. Ndërsa jugu digjej, pjesë të tjera të kontinentit u përballën me një tjetër ekstrem: reshje të dendura dhe përmbytje. Në Zvicër, një rrëshqitje e madhe dherash në zonën e Blatten shkaktoi viktima dhe dëme serioze në infrastrukturë.

Edhe pse Europa nuk ka regjistruar të njëjtat shifra dëmesh financiare si SHBA-të, ku stuhitë dhe uraganet kanë qenë veçanërisht të kushtueshme, ndikimi lokal ka qenë i rëndë. Sipas Munich Re, vetëm në Evropë humbjet ekonomike për gjysmën e parë të vitit kapin shifrën e pesë miliardë dollarëve. Por përtej numrave, dëmet afatgjata në mjedis dhe në jetën e komuniteteve janë të pallogaritshme.

Kjo verë e 2025 është një paralajmërim i qartë për të gjithë. Ndryshimet klimatike po e bëjnë gjithnjë e më të zakonshme atë që dikur dukej e jashtëzakonshme: zjarret që shpërthejnë me shpejtësi, valët e të nxehtit që zgjasin me javë dhe përmbytjet që vijnë pa paralajmërim. Përballë këtij realiteti, mbrojtja, parandalimi dhe planet emergjente nuk janë më zgjedhje, por domosdoshmëri. Dhe ndërsa natyra po dërgon sinjal pas sinjali, mbetet detyra jonë të mësojmë, të përshtatemi dhe të marrim masa, përpara se një tjetër verë të na gjejë sërish të papërgatitur.