Me shqetësim të thellë dhe dhimbje të madhe kemi ndjekur bilancin tragjik të aksidenteve rrugore në orët e fundit në vend, ku disa ngjarje të rënda, veçanërisht në zonën e Vlorës dhe në aksin e Drashovicës, kanë sjellë humbje jete dhe plagosje të rënda. Këto nuk janë më thjesht lajme apo statistika, por histori reale që lënë pas familje të shkatërruara dhe një ndjenjë pasigurie për të gjithë shoqërinë.

Shoqata e Siguruesve të Shqipërisë shpreh ngushëllimet më të sinqerta për familjarët e viktimave dhe solidaritet të plotë me të gjithë të prekurit. Kjo situatë është një alarm i fortë që kërkon reflektim dhe veprim të menjëhershëm nga të gjithë aktorët përgjegjës, por edhe nga çdo qytetar që është pjesë e përditshme e rrugës.

Është e domosdoshme të rriten masat parandaluese në segmentet më problematike, të forcohen kontrollet dhe zbatimi i rregullave të qarkullimit, si dhe të shtohen investimet në sigurinë rrugore dhe edukimin e drejtuesve të mjeteve. Po aq e rëndësishme mbetet edhe përmirësimi i sistemit të ekspertizës së aksidenteve, në mënyrë që çdo rast të trajtohet me profesionalizëm dhe drejtësi, duke shmangur konkluzione të gabuara.

Në këtë realitet të dhimbshëm, bëhet edhe më e qartë rëndësia e të qenit i siguruar. Sigurimi nuk është thjesht një detyrim ligjor, por një mbrojtje konkrete për veten, familjen dhe palët e treta, një garanci që në momentet më të vështira nuk mbetesh vetëm përballë pasojave financiare dhe sociale që sjell një aksident. Të jesh i siguruar do të thotë të kesh një mbështetje reale kur jeta ndryshon në një çast.

Siguria rrugore është një përgjegjësi e përbashkët që kërkon ndërgjegjësim, kujdes dhe respekt për jetën. Shoqata e Siguruesve të Shqipërisë mbetet e përkushtuar për të kontribuar në rritjen e këtij ndërgjegjësimi dhe në mbështetjen e çdo nisme që vendos jetën dhe sigurinë në plan të parë.

Asnjë humbje jete në rrugë nuk duhet të konsiderohet normale.