Hajdarmataj: Sigurimi i pasagjerëve në transportin publik, dëmshpërblim në rast aksidentesh gjatë udhëtimit
Sigurimi i detyrueshëm i pasagjerëve është një nga ato sigurime për të cilat qytetarët flasin shumë pak, por që ka një rëndësi të jashtëzakonshme. Shumë njerëz nuk janë në dijeni se, kur udhëtojnë me një autobus urban, interurban apo mjete të tjera të transportit publik të licencuar, ata duhet të jenë të mbuluar nga ky sigurim në rast aksidenti.
Ky është një mekanizëm mbrojtjeje sociale që garanton dëmshpërblimin e pasagjerëve ose të familjarëve të tyre në rast humbjeje jete apo dëmtimi fizik, sipas kushteve dhe kufijve të parashikuar nga ligji dhe kontrata e sigurimit.
Nga këndvështrimi i Shoqatës Shqiptare të Siguruesve, është e rëndësishme që qytetarët të informohen jo vetëm për ekzistencën e këtij sigurimi, por edhe për të drejtat që u lindin në rast aksidenti. Edukimi financiar nuk lidhet vetëm me blerjen e një police sigurimi, por edhe me njohjen e mbrojtjes që ligji u ofron qytetarëve në situata të caktuara.
Po aq e rëndësishme është që operatorët e transportit publik të respektojnë detyrimet ligjore për pajisjen me sigurimin përkatës dhe të garantojnë se pasagjerët udhëtojnë në përputhje me standardet e sigurisë dhe mbrojtjes financiare.
Sigurimi nuk e shmang aksidentin, por siguron që pasojat ekonomike të tij të mos rëndojnë tërësisht mbi qytetarin dhe familjen e tij. Kjo është arsyeja pse ai mbetet një instrument thelbësor i mbrojtjes së interesit publik.
